Почетна Вести

Лидерите се договорија: СДСМ влегува во пет министерства, Груевски заминува од функцијата во јануари

Предвремени избори на 24 април 2016 година, именување специјален јавен обвинител до 15 септември годинава кој ќе ја води истрагата за прислушувањето и случајот „Пуч“, оставка на владата на чело со Груевски 100 дена пред изборите и враќање на СДСМ во парламентот на 1 септември, стои во Протоколот од Документот потпишан од лидерите на четирите политички партии.

Според потпишаното, СДСМ треба да предложи министри за внатрешни работи и труд и социјална политика, кои треба да бидат избрани на 20 октомври 2015, а ВМРО-ДПМНЕ ќе предложи заменици министри.

СДСМ ќе добие заменици министри за финансии, информатичко општество и информатика, и за земјоделство.

И Заев и Груевски изјавија дека се задоволни од постигнатиот договор.

„Баравме оставка од Груевски и ја добивме. Баравме преодна влада и ја добивме, која ќе е гарант за организирање на фер и слободни избори“, рече на синоќешната прес конференција лидерот на СДСМ, Зоран Заев.

ВМРО-ДПМНЕ ќе назначи нов премиер за период од 100 дена од 15 јануари 2016 година. Се согласивме од 20 октомври СДСМ, по претходна консултација до ВМРО-ДПМНЕ и ДУИ, да даде предлог за технички министер за внатрешни работи и личност која на ниту еден начин не се поврзува со некоја политичка партија, рече Груевски.

Во продолжение во го пренесуваме целосниот Протокол на Договорот.

Протокол кон Договорот од 2 јуни 2015 година

Во договор на 2 јуни, член 6, прва алинеја, се вели:

„До 10 јуни, партиите да се договорат за точната организација на владата која ќе ги подготвува  изборите”. На 19 јуни, лидерите ја потврдија својата посветеност на гореспоменатиот договор во писмена форма и се согласија да ги продолжат разговорите.

Овој Протокол ја комплетира првата алинеја од членот 6. Тој треба да претставува составен дел на Договорот од 2 јуни.

Долупотпишаните партии постигнаа согласност за следново:

1. На 1 Септември 2015, СДСМ ќе се врати во парламентот, како што е утврдено во втората алинеја на член 6 од Договорот од 2 јуни.

2. На 20 октомври 2015 година, нов министер за внатрешни работи ќе биде именуван по предлог на СДСМ и во консултација со ВМРО-ДПМНЕ и ДУИ. Овој министер ќе биде технички поставен.

3. На 20 октомври 2015 година, ќе биде назначен нов министер за труд и социјална политика, по предлог на СДСМ.

4. На 20 октомври 2015 година, нови, дополнителни замениците-министри ќе бидат назначени за следните министерства:

a. Министерството за внатрешни работи, по предлог на ВМРО-ДПМНЕ

б. Министерството за труд и социјална политика, по предлог на ВМРО-ДПМНЕ

в. Министерството за финансии, на предлог од СДСМ

г. Министерството за земјоделство, шумарство и водостопанство, по предлог на СДСМ

д. Министерството за информатичко општество и администрација, по предлог на СДСМ

Овие заменици-министри ќе имаат полно право на преглед и вето во нивните министерства во сите правни, финансиски и кадровски прашања поврзани со организацијата на изборите. Сите горенаведени нови министри и заменици- министри ќе останат на своите позиции во новата влада.

5. Актуелната Влада ќе ја поднесе својата официјална оставка до Собранието во догледно време да овозможи, новата влада да биде инаугурирана на 15 јануари 2016 година, 100 дена пред парламентарните избори кои ќе се одржат на 24 април 2016 година.На чело на новата влада ќе биде новиот премиер номиниран од страна на ВМРО-ДПМНЕ. Новата влада ќе има мандат до  предвремените парламентарни избори.

6. Горенаведеното правило значи дека актуелната Влада ќе поднесе оставка на време,  и 100 дена пред следните избори ќе биде назначена новата влада, која ќе треба да ги спроведе потребните законски измени што е можно поскоро за следните избори.

7. Страните се обврзуваат кон овој Договор во целост и со добра волја. Партиите, исто така, се обврзуваат да се избегнат какви било нови пречки вклучително и во однос на одржувањето на изборите на 24 април 2016 година.

8. Третата алинеја од член 6 се завршува како што следи: по „итна акција“, и се додава следниов текст:

До 15 септември 2015 година, ќе има нов, специјален обвинител со целосна автономија да ја води истрагата околу разговорите кои произлегуваат од следењето на комуникациите. Специјалниот обвинител го именуваат долупотпишаните страни.”

Скопје, 15 Јули, 2015